وهذه ابيات جميله من الدارميات اهديهاااا الكم وانشاء الله تعجبكم

لو تطش مو تيزاب لو تزرع الغام اللحم خله يروح اوصلك اعظام

دلالي ما معيوب مات بمجانه *** وماتت بگايه الروح من فارگانه
هوه الاسف شيفيدك ماعنده غيره *** بس الاسف عالروح ظلت اسيره
ليل وسهر واشواك طبكن سوية *** وسفة التعبت وياه يروح من ادية
اسبح وافكر بيك ياماي العيون *** قاصر درت عالراس حسبالي صابون
الدنيا للتهـواه ترقصـله جــوبي *** وآنه الفكَـر يا ناس شگالي ثوبـي
رمش ولو ترميش اعرف تعايد *** لو غالي الترميش لا ماني رايد

اهلا و سهلا بيك يالجنت غايب *** بالمحكمة نحييك يابو المصايب

اهلا وسهلا بيك يابعد روحي شوفتك والله اليوم بلسم اجروحي

اهلا وسهلا بيك يالجنت غايب وكليبي من فركاك تحمل مصايب

وحدك تظل بالروح حاكم عليهه *** لو جاهه مللك الموت انته اوله بيهه
انا جثير اسهام عذالي يزاجي *** النذل مايسوالعتب خذه تراجي
فارغ تروح وياي للمحكمه اليوم *** اتنازل من الروح وتاخذهه للدوم
شماتي مو شمات شماتي اربع *** وخامسهم زغيرون وك بعده يرضع

شماتي مو شمات شماتي ميه *** حتى الگبر يفلان هدموا عليه

شماتي مو شمات شماتي مليون *** بالگبر ويظحكون حسبالي يبجون

عيد اليمر عألناس لا تظن عيدي *** عيدي امن اكون اوياك وايدك بأيدي
صحبتنه صحبة عمر وخوتنه حد الموت .... يمكن اعوفك نعم بس واني بالتابوت
لاجلك صمت رمضان والدمع جاري *** دهر انا اصومه عليك لو صرت جاري

وين البخت يفلان وتگلي مبخوت *** وانا طلعت محسود حتى على تابوت
حبل اليجذب اگصير بالك تشده *** ترى ينگطع ولله وي التوده

دمعي نزل موجات سواهه هوسه *** نتحاسب انا وياك بكل دمعه بوسه

كل دمعه بوسه تريد اقبل يمحبوب *** دمع الهملته عليك خلاك مطلوب

سبت واحد واثنين احلى ايامي *** بيهن اشوف هواي وبيهن احلامي

سبت واحد وثنين شفت التحبهه *** احلم اشوف بيوم واحد يشبهه

بالحلم جنك جيت من ذاك الغياب *** كبل ايدي شفت الروح فتحتلك الباب

زين انته عمي تنام تحلم بالاحباب *** ما غمضت العينين وانطر على الباب

هوه البجي شيفيد لا والله هيهات *** لا رجع العدلين لا رجع المات

هم غربه هم فراك هم باجر العيد *** والروح شوك تزيد ملكاكم تريد

ليل وسهر واشواك طبكن سوية *** وسفة التعبت وياه يروح من ادية

الروح شوگ تريد بس هوه وينه *** جوه الارض مدفون يختي الحزينه

مخلص اظل وياك حد يوم الوداع *** هم انته مثلي تصير لو تنكر بساع

رفرفت مثل الطير روحي على فركاك *** لا يمي افرح بيك لا اكدر انساك

حيرني طيب البيك خلاني مديون *** اتمنى ارد الدين ما اعرف شلون

صدگني عالخوان دوم اسئل بشوگ *** الخوه ياطيبين بس الكم تلوگ

مخلص اظل وياك وانا ابقه ممنون *** بس لو خنت يفلان غيرا گلب الكون

رفرفت مثل الطير وتريدك بساع *** للنجف واتعناك واحفرهه للگاع

للطيب نمطر طيب للصاحب الزين *** وافديله حتى الروح وعيوني الاثنين

غالي وتظل يفلان تاج على راسي ** انته الاخو والخال حتى اغلى ناسي

بالحلم جنك جيت من ذاك الغياب *** كبل ايدي شفت الروح فتحتلك الباب

خايف أدك عليك وخايف تملني *** فز كلبي تالي الليل وعنك سألني

بالحلم جنك جيت جن عايدتني *** بستك ثلث مرات بس ما بستني

رمشلي بس ترميش تلگاني يمك *** ومصدگه هيه الروح تگعد تشمك

انتي استكان الجاي واني الشكر بيج ... صح اني لمحليج بس ابقة ذايب بيج

انته الشكر والجاي وانته الجگاره *** والگلب من فرگاك مشتعله ناره
نوح وقهر وفراك وجماله غربه *** والعيد بغداد بس الله ربه
بالشطره من مريت حجامي واكف *** ويه الكرم و الجود وهل المظايف

للحجامي افدي الروح و عيوني لاثنين *** و العمر فدوه يروح للصاحب الزين

أخوي انته و عزيزي و تاج فوك الراس *** و غيرتك يا سبع من غيرة العباس

ماقصرت وياك لوبيه مريت *** احنا النظل خطار وانتم اهل بيت

عالحگ نظل للدوم ما نعرف نحيد *** ولد العراق اكرام كلهم اجاويد

سالم يبعد الروح كون انته سالم *** والله وتظل للدوم بالدنيه غانم
كل اعيادي بالغربه والناس ابتلت بيه *** غريبه الدار مهمومه والدمعات عيديه
جيتك غفل يهواي ناوشني بوسة*** دزها برسالة بساع لاسوي هوس
مو بوسه اخذ اثنين والثالثه اتهون ... طبع اليـحب ياهواي ما يرجع ايـخون

لاتظن حي وانساك وبعيني رسمك إسمي الثلاثي انساه وماانسه إسمك

لاتظن وانته بعيد تنساك الكلوب رسمك بنص العين وبكلبي مكتوب

ثاري الگلب بالشوف أقوى من العيون يعني التضيعه العين بالگلب مدفون

متوسد انته الروح وبنصها غافي كل البشر مغشوش بس انته صافي

حته الگمر بالليل بعيوني شفته صارت گباله وغاب واتخيل انته

وردة وعطرها ايفوح واتمنه اشمها كل البنات اضيع من تمشي يمها

أعتب عليك اهواي ياضي الشموع ليش المسج وياي من فترة مگطوع

گلبج وگلبي اثنين واحد دربنه هم وتعب واشواك عذبنه حبنه

أشلع اهدوب العين وخيط جروحك ونتبادل آنه اوياك روحي اويه روحك

گلب الوفي صندوگـ وبيدك المفتاح أمن اسرارك بيه وبنومك ارتاح

أهديلك البوسات كلهن فرد نوب لو غاروا العذال طبهم ألف طوب

ردتك تجيني اليوم وبعيني اشوفك وشلون اصبر الروح من گتلي اعوفك

صح من انام الليل واتغمض العيون بس الگلب والروح بيكم يفكرون

انخاني شوف اشلون راح انتخيلك اتعكز اعله اضلوع صدري وأجيلك

گطعني ذبني بنار واحرگني بيدك ألتم وارد اردود بس گول اريدك

شدني بجذع من نار وارميني چيلات يدفنوني اجيك بليل بالگبر مابات

الگلب تالي الليل فز فرد فزه لو للحبيب اتروح لو نحري احزه

بالدمع غرگانات ظلن يالعيون الفارگـ الخلان يتبسم اشلون

هنيالك انته اتنام ليلك بلا هموم صدگني من فرگاك من نومي محروم

شوف شكثر ولهان وتعبان بالي بس إلك روحي اتهيد والله يغالي

هاك الگلب يفلان أخذه برسالة گعدني نص اللي ليشكيلي حاله

لو تدري بيه شصار من غبت عني مثل اليهيم بليل وبراسه جني

إحنه بجسد روحين والدم فرد دم والگلب واحد صار بالفرح والهم
وهذه ابيات جميله من الدارميات اهديهاااا الكم وانشاء الله تعجبكم 42637

وهذه ابيات جميله من الدارميات اهديهاااا الكم وانشاء الله تعجبكم 42637

بارك الله فيـــــك اخي على هذه الكلمات جميله

جزاك الله خيراً

بارك الله بيك وجزاك خير

جميل جـــــــداً

بارك الله بيك

بارك الله فيك و جزاك خيرا

بارك الله بيك عالكلمات الرائعه

جزاك الله خير الجزاء

بارك الله فيك وجزاك الله خيــــــراً

» ابوذيات جميله ومختاره ان شاء الله تعجبكم
» ابيات في مدح نبي الرحمة صلى الله عليه وسم
» جمل اعجبتني وان شاء الله تعجبكم
» ابيات في الادب للمتنبي ...
» نكات على الماشي اتمنى ان تعجبكم